MU KARERE KA GASABO HIZIHIRIJWE UMUNSI MPUZAMAHANGA W’UBUMENYI BW’IKIRERE

Buri mwaka u Rwanda rwifatanya n’Isi yose kwizihiza umunsi mpuzamahanga w’Ubumenyi bw’Ikirere wizihizwa ku itariki ya 23 Werurwe. Mu buryo bw’umwihariko uyu munsi mu Rwanda wizihirijwe mu muganda wabaye ku itariki ya 28 Werurwe 2026 mu karere ka Gasabo hamwe no kwizihiza Umunsi Mpuzamahanga w’Amazi n’uw’Amashyamba.

Muri uyu mwaka, Umunsi mpuzamahanga y’Ubumenyi bw’ikirere  ufite insanganyamatsiko igira iti “Tumenye ikirere cya none, Turinde Ejo Hazaza” mukwizihiza Umunsi Mpuzamahanga w’Ubumenyi bw’Ikirere abakozi ba METEO RWANDA hamwe n’abafatanyabikorwa batandukanye bifatanyije n’abaturage bo mu karere ka Gasabo, Umurenge wa Rutunga mu muganda rusange waranzwe no gutera ibiti by’amoko atandukanye, Habayeho n’umwanya wo kuganira n’abaturage ku gukoresha amakuru y’ikirere hagamijwe kurinda ahazaza.

Abaturage bitabiriye kwizihiza iyi minsi Mpuzamahanga y’impurirane bagaragaje ko ari amahirwe akomeye gutererwa ibiti no gusobanurirwa akamaro ko gukoresha amakuru y’ikirere kuko bizabafasha guhangana n’imihindagurikire y’ikirere.

SEMINEGA Jean Damascene “Tunejejwe n’uko badufashije gutera ibiti bizatugira umumaro haba mu kurwanya isure ndetse no mu kubungabunga Ikiyaga cya Muhazi kitwegereye, ni amahirwe menshi  kubona abadusobanurira akamaro k’amashyamba, amazi ndetse n’amakuru y’ikirere, tugiye kujya mu ngamba kuko twasobanuriwe ko byose ari ishingiro ry’ubuzima bwiza n’ubukungu”

Umuyobozi Nshingwabikorwa w’Akarere ka Gasabo Mr.Bayasese Bernard yashimiye uruhare ibi bigo byose bigira mu iterambere ry’umuturage n’igihugu muri rusange.“Dufatanyije n’abaturajye b’akarere ka Gasabo tuzakomeza kubungabunga  amashyamba, amazi tunakoresha neza amakuru y’ikirere kuko adufasha gufata ibyemezo nyabyo bizamura iterambere ryacu”

Mu ijambo yagejeje kubitabiriye Minisitiri w’ibidukikije Hon. Dr. Bernadette Arakwiye yabashimiye ubwitabire bwabo mu kwizihiza Umunsi Mpuzamahanga ya Amazi,Amashyamba n’Ubumenyi bw’Ikirere “kwizihiza umunsi w’amashyamba turazirikana ko amashyamba ari ubukungu tukaba dusabwa gukumira icyari cyo cyose cyayangiza.Nk’uko insanganyamatsiko yo kwizihiza umunsi mpuzamahanga w’amazi uyu mwaka ibigaragaza, ni uruhare rwacu twese kuyabungabunga kugira ngo abashe kutugeraho twese.Turashishikarizwa gukurikira no gukoresha neza amakuru y’ikirere kuko adufasha gukumira ingaruka z’imihindagurikire y’ikirere.Minisitiri yashimiye kandi abafatanyabikorwa ku ruhare rwabo rukomeye mu gutuma amazi agera kuri benshi ndetse no kubungabungu amashyamba hamwe n’abagira uruhare mu gutuma amakuru y’ikirere agera kuri bose kandi yizewe”

Umunsi Mpuzamahanga w’Ubumenyi bw’Ikirere wizihizwa buri mwaka ku itariki ya 23 Werurwe, ukaba wizihirizwa hakorwa ibikorwa bitandukanye bihuza inzego zitandukanye, hakaganirwa kumikoreshereze inoze y’amakuru y’ikirere hamwe n’uruhare rwayo mu iterambere ry’igihugu.